Beatus Bernardus Lichtenberg I

Bernardus Lichtenberg
beatus presbyter et martyr

* Ohlau 3° Decembris 1875°
† Hof  5° Novembris 1943°

dies memoriae: 5° Novembris

➚Bernardus Lichtenberg d. 3° m. Decembris a. 1875° in Silesiae oppido nomine Ohlau (hodie Polonice Oława) natus est. Anno 1899° Vratislaviae ordinationem sacerdotalem recepit, anno post (1900°) Bero­linum venit, ubi sacerdos egregie pius indefesse et impavide omnem curam in operibus pastoralibus et caritativis posuit; ibi anno 1932° parochus ecclesiae cathedralis, anno 1938° etiam praepositus cathe­dralis factus est. Cum autem tempestate Hitleriana publice pro Iudaeis oppressis oraret et necem sub nomine «euthanasiae» patratam condemnaret, ab Occulta Civitatis Custodia (Gestapo) d. 23° m. Octo­bris a. 1941° comprehensus et a iudicio extraordinario d. 22° m. Maii a. 1942° damnatus est. Per bien­nium captivitate retentus gravi morbo affectus est et, cum in castra coercitionis (KZ) prope urbem Dachau sita de­portaretur, d. 5° m. Novembris a. 1943° in urbe Hof mortem obiit. Die 23° m. Iunii a. 1996° a sancto Pontifice Ioanne Paulo II° in urbe Berolino sollemniter beatus martyr de­cla­ratus est. Se­pulcrum beati Bernardi hodie in capella subterranea ecclesiae cathedralis Berolinensis Sanctae Hedvigi dicatae situm est.

Omnia in lumine aeternitatis consideremus et iudicemus et proinde agamus.
Quaedam verba a Bernardo Lichtenberg in captivitate ad se ipsum conscripta:

Incipe igitur, anima mea, mane expergiscens lente et considerate dicere haec: «Hodie omnia sub specie aeternitatis conspiciam, omnia, quae mihi occurrent, laeta et dolorosa, elevantia et deprimentia me».
Fortasse iam post paucas septimanas alterum propositum adiciam vel addere debebo, iam enim anim­adverti id, quod me impedit, dico impatientiam meam. Ergo posthac primum popositum secutus lente et considerate dicam: «Hodie animam meam cum patientia possidere volo». Hoc enim scio: etiamsi milliens patientiam amisero, tamen propositum patientiae identidem renovabo.
Fortasse post paucos menses sciam, quamobrem tam cito patientiam amittam: Nimis cito loqui soleo, cor meum quasi in lingua est; cum aliquid aegre fero, id nimis cito profero; itaque tertium pro­positum adiciam: «Hodie nullo verbo peccabo». Et quia omni verbo cogitatio quaedam praecurrit, tertium pro­po­situm his verbis exprimam: «Hodie nulla cogitatione nulloque verbo peccabo». Nunc orbis clausus esse videtur. Posthac aliquot annos secundum hoc praeceptum agam, et si videro me nondum talem ho­mi­nem esse, ut civibus meis, familiae, collegis factus sim «amor et deliciae», insistam et causam dili­gen­tius et funditus investigabo: «Quis quidve me impedit?» Et tum inveniam hoc: Deest mihi sensus vere supernaturalis. Volo enim tantum hominibus placere, non Deo amabili. Malim laudari et probari. Mo­leste fero, si me vituperant vel admonent vel per ludibrium iudicant.
Itaque quartum adiciam propositum: «Hodie omnia caritate faciam et omnia caritate patiar». Posthac aliquot annos fideliter secundum hoc praeceptum agere volo, deinde videbo, quo usque progressus sim; et Deus amabilis utinam recte me curet! Et hoc iam facit Deus: «Quem enim diligit, Dominus cor­ripit» (Prv 3,12). «Flagellat omnem filium, quem recipit» (Hebr 12,6). Quotiens in curatione animarum pastorali vidi hoc esse verum!

Beate Bernarde, ora pro nobis!

Nuntii, qui ad preces intercedente beato Bernardo exauditas attinent, mittantur ad postulatorem dioecesanum:

Dr. Gotthard Klein
Bethaniendamm 29
10997 Berlin
GERMANIA

postulator@bernhard-lichtenberg-kapelle.de
Bernhard-Lichtenberg-Kapelle