Bernardus Lichtenberg

beatus sacerdos et martyr

* Ohlau 3° Decembris 1875
† Hof  5° Novembris 1943

dies memoriae: 5° Novembris

Deus, Pater omnium hominum, tibi semper fidelis beatus Bernardus Lichtenberg iniustae potestati restitit et ad mortem compulsus sua sponte martyr pro dignitate hominis vitam suam obtulit. Da nobis quoque, ut voluntatem tuam cognoscere studeamus et voci conscientiae nostrae obsequamur.

Bernardus Lichtenberg die 3° mensis Decembris anno 1875 in Silesiae oppido nomine Ohlau (hodie Polonice Oława) natus est. Anno 1899 Vratislaviae ordinationem sacerdotalem recepit, anno post (1900) Berolinum venit, ubi sacerdos egregie pius indefesse et impavide omnem curam in operibus pastoralibus et caritativis posuit; ibi anno 1932 parochus ecclesiae cathedralis, anno 1938 etiam praepositus cathedralis factus est. Cum autem tempestate Hitleriana publice pro Iudaeis oppressis oraret et necem sub nomine 'euthanasiae' patratam condemnaret, ab occulta civitatis custodia (Gestapo) die 23° mensis Octobris anno 1941 comprehensus et a iudicio extraordinario die 22° mensis Maii anno 1943 damnatus est. Per biennium captivitate retentus gravi morbo affectus est et, cum in castra coercitionis (KZ) prope urbem Dachau sita deportaretur, die 5° mensis Novembris anno 1943 in urbe Hof mortem obiit. Die 23° mensis Iunii anno 1996 a Pontifice Ioanne Paulo II in urbe Berolino sollemniter beatus martyr declaratus est. Sepulcrum beati Bernardi hodie in capella subterranea ecclesiae cathedralis Berolinensis Sanctae Hedvigi dicatae situm est.

Omnia in lumine aeternitatis consideremus et iudicemus et proinde agamus.

Beate Bernarde, ora pro nobis!

Nuntii, qui ad preces intercedente beato Bernardo exauditas attinent, mittantur ad hanc inscriptionem cursualem:
Dompropst Dr. Stefan Dybowski
Hinter der Katholischen Kirche 3
10117 Berlin
GERMANIA

stefan.dybowski@erzbistumberlin.de

Pagina prima | Ultima mutatio: 3° Decembris 2009 © Diözesanarchiv Berlin